Поранешниот свештеник на Српската православна црква во Љубљана, Жељко Лубарда, објави дека Обвинителството во Словенија поднело обвинение против српскиот патријарх Порфириј (граѓанско име Првослав Периќ) пред суд во Љубљана.
Според неговото соопштение, обвинението се однесува на наводно кривично дело злоставување поврзано со периодот кога Лубарда работел како свештеник во Црковната општина во Љубљана. Тој наведува дека обвинението е поднесено врз основа на членовите 196 и 197 од Кривичниот закон на Република Словенија.
Лубарда тврди дека бил изложен на повеќегодишно систематско малтретирање, кое, како што наведува, било утврдено и во постапка пред Судот за работни и социјални права во Словенија. Според неговите тврдења, во таа постапка биле наведени десетици конкретни случаи на наводно злоставување, меѓу кои дисциплински мерки, преместувања и отказ на работниот однос.
Тој истакнува дека по отказот останал без работа и без приходи заедно со сопругата и четирите деца, а дека последиците од настаните оставиле сериозни здравствени проблеми.
Според неговото тврдење, конфликтот бил поврзан и со неговото сведочење во кривична постапка против поранешен свештеник во Љубљана, кој во меѓувреме бил правосилно осуден.
Во соопштението Лубарда наведува дека обвинителството смета дека клучна улога во настаните имал тогашниот митрополит загрепско-љубљански, а денешен поглавар на Српската православна црква, патријархот Порфириј.
Засега нема официјална реакција од Српската православна црква во врска со овие наводи.
Според информациите изнесени во соопштението, судот треба да го разгледа предметот, по што се очекува да биде закажан почетокот на судската постапка.
