Реисул Улема на Исламската верска заедница на Северна Македонија, Хафиз Шаќир еф. Фетаи, ја посети Исламската заедница на Бугарија, каде му го честиташе изборот на новиот главен муфтија Ахмед Асанов.
Фетаи во Софија беше придружуван од делегација на ИВЗ, во која беа генералниот секретар Ирсал еф. Јакупи, тетовскиот муфтија Селвер еф. Џемаили, деканот на Факултетот за исламски науки Абдулџемил еф. Несими, штипскиот муфтија Насир еф. Реџепи и генералниот директор на „Медреса Иса Бег“, Ислам Ислами.
Делегацијата била пречекана од новоизбраниот главен муфтија на Исламската заедница на Бугарија, Ахмед Асанов, заедно со поранешниот главен муфтија Мустафа Хаџи, кој по изборот за новата функција е претседател на Собранието на Исламската заедница на Бугарија.
Фетаи му упатил честитки на Асанов за изборот и му посакал успех во извршувањето на новата функција. Честитки биле упатени и до Мустафа Хаџи по повод неговиот избор за претседател на Собранието.
На средбата, како што соопшти ИВЗ, било разговарано за соработката меѓу двете исламски заедници и за досегашната размена на искуства.
Од двете страни било оценето дека соработката треба да продолжи и во иднина, со акцент на меѓусебното почитување, братството и размената на институционални искуства.
Фетаи на крајот од средбата го поканил новоизбраниот бугарски главен муфтија Ахмед Асанов да ја посети Исламската верска заедница на Северна Македонија.
Посетата во Софија доаѓа по изборот на ново раководство на Исламската заедница на Бугарија, со што односите меѓу двете институции добиваат и нов институционален контекст.
