Осум црковни делегации пристигнаа во Москва за 80-тиот роденден на Кирил, меѓу нив и делегација на МПЦ-ОА

Date:

Share post:

Поглавари на православни цркви и црковни делегации од повеќе земји пристигнаа во Москва на одбележувањето на 80-тиот роденден на рускиот патријарх Кирил, кој се одбележува на 20 ноември.

Според досега објавените информации на Одделот за надворешни црковни врски на Московската патријаршија, во руската престолнина пристигнале делегации од Ерусалимската, Антиохиската, Грузиската, Бугарската, Албанската и Македонската православна црква, како и поглаварот на Православната црква на Чешка и Словачка и претстојателот на Јапонската автономна православна црква.

Меѓу пристигнатите се двајца патријарси, еден митрополит кој е поглавар на автокефална црква и еден поглавар на автономна црква. Заедно со рускиот патријарх Кирил, кој е домаќин на прославата, во Москва се наоѓаат четворица поглавари на автокефални помесни православни цркви, доколку се сметаат и домаќинот.

Од патријарсите пристигнаа Ерусалимскиот Теофил III и Антиохискиот Јован X. На 19 ноември пристигна и митрополитот Ростислав, поглавар на Православната црква на Чешка и Словачка, додека претходниот ден во Москва допатува и архиепископот Серафим, митрополит на Токио и на цела Јапонија, поглавар на Јапонската автономна православна црква.

Кои црковни делегации пристигнаа во Москва?

Ерусалимска патријаршија: На 19 ноември пристигна патријархот Теофил III, во придружба на митрополитот Капитолијадски Исихиј, архимандритот Стефан (Диспиракис), претставник на Ерусалимскиот патријарх при Московскиот патријарх, и архиѓаконот Марк (Хендерсон).

Антиохиска патријаршија: Патријархот Јован X пристигна на 18 ноември. Во неговата придружба се митрополитот Тирски и Сидонски Илија, митрополитот Алепски Ефрем, епископот Тарски Павле, архимандрити, јероѓакони и други членови на делегацијата.

Грузиска православна црква: Делегацијата ја сочинуваат митрополитот Ахалцихски и Тао-Кларџетски Теодор, митрополитот Зугдидски и Цаишки Герасим, митрополитот Гориски и Атенски Андреј, епископот Никорцминдски Вахтанг и протопрезвитерот Георгиј Звјададзе.

Бугарска православна црква: Пристигнаа епископот Велбуждски Исак и Михаил Тасков.

Албанска православна црква: Делегацијата ја сочинуваат епископот Амантиски Игнатиј и јеромонахот Јован (Коровеши).

Православна црква на Чешка и Словачка: На 19 ноември пристигна нејзиниот поглавар, митрополитот Ростислав, во придружба на протојереј Стефан Пружински.

Јапонска автономна православна црква: На 18 ноември пристигна архиепископот Токиски и митрополит на цела Јапонија Серафим, кој е поглавар на оваа автономна црква. Тој е придружуван од свештеници и други членови на делегацијата.

Македонска православна црква – Охридска архиепископија: На 19 ноември во Москва пристигна и македонската црковна делегација, предводена од митрополитот Дебарско-кичевски Георгиј, во придружба на епископот Хераклејски Климент. Делегацијата беше пречекана на аеродромот Шереметјево.

Се очекува и српскиот патријарх Порфириј

Во најавите за прославата се споменува и учеството на српскиот патријарх Порфириј. Според претходните информации, тој е меѓу поглаварите на помесните православни цркви кои се очекува да допатуваат во Москва за свечената литургија на 20 ноември во храмот „Христос Спасител“. Неговата посета е најавена на сајтот на СПЦ.

На прославата се очекува да присуствуваат и претставници на други православни цркви, меѓу кои и на Православната црква во Америка.

Пристигнувањето на толку високи црковни претставници во Москва се случува во период на сложени односи во православниот свет, обележани со несогласувања околу црковното единство, автокефалијата и односите меѓу помесните цркви.

Свечената литургија по повод 80-тиот роденден на патријархот Кирил е најавена за 20 ноември во храмот „Христос Спасител“ во Москва.

LEAVE A REPLY

Please enter your comment!
Please enter your name here

spot_img