Ерусалимската патријаршија соопшти дека овогодишните богослужби за Страсната седмица и Велигден ќе се одржуваат исклучиво во рамки на редовните црковни служби, без дополнителни литургиски настани како што се литиите, поради војната и влошената безбедносна состојба во Светата Земја.
Во официјалното соопштение се наведува дека ова е трета година по ред во која празнувањата се одвиваат во услови на сериозна хуманитарна криза. Патријаршијата нагласува дека останува посветена на својата духовна и историска мисија – зачувување на христијанското присуство, заштита на светоста на богослужбите и одржување на постојниот статус кво на светите места.
Се истакнува дека, и покрај тешките услови, се прават напори богослужбите да се одржат на нивните традиционални места и во предвидените термини, со цел да се зачуваат стекнатите права и историскиот поредок.
Патријаршијата изрази загриженост за состојбата во Газа, наведувајќи дека страдањето на населението претставува повреда на човечкото достоинство и правото на живот. Воедно се посочува и на нападите врз цивили и нивниот имот на Западниот Брег, како и на ограничувањата за верниците во пристапот до џамијата Ал-Акса.
Од Патријаршијата нагласуваат дека одлуката за ограничување на празнувањата само на богослужби е донесена од почит кон страдањето на луѓето и со цел да се зачува достоинството на празничните денови. Се потврдува и посветеноста за зачувување на историската и правна гаранција за заштита на светите места и верските права.
Во соопштението се упатува молитва за воспоставување праведен мир, зачувување на достоинството на секој човек и за Ерусалим да остане симбол на верата, надежта и љубовта.
