Српскиот византолог Срѓан Пириватрич, автор на една од позначајните современи студии за Самуиловата држава, отворено ја застапува тезата карактеристична за бугарската историографија – дека цар Самуил го обновил бугарското царство и дека неговите наследници управувале со него.
Во интервју за бугарската БТВ, Пириватрич, кој работи во Институтот за византологија при Српската академија на науките и уметностите, вели дека во научната историографија не гледа сериозна дилема околу политичкиот карактер на Самуиловата држава.
„Целосно е јасно дека Самуил бил обновител на бугарското царство, кое претходно било разурнато во војната со Византиската Империја. Тој го обновил, а неговите наследници управувале со него“, вели Пириватрич.
На прашањето дали на Балканот денес постои јасна слика за тоа кој бил Самуил, Пириватрич прави разлика меѓу националните историски толкувања и научната историографија.
„Сите средини, вклучително и националните историографии, а на крајот и индивидуалните погледи кон минатото, се целосно легитимни. Сепак, барем што се однесува до научната историографија, мислам дека не може да има сериозни дилеми“, вели тој.
Според Пириватрич, може да се дискутира за потеклото на Самуиловиот род, вклучително и за наводната арменска врска која се појавува во современи арменски извори. Но, тоа според него не
Пириватрич го смета Самуил за еден од најзначајните владетели во средновековната историја на Балканот.
„Цар Самуил сигурно е еден од најважните владетели“, вели тој, додавајќи дека Самуил во период од речиси половина век успеал „на одреден начин да го промени текот на балканската историја“.
Според него, периодот на Самуил има значење и за поширокиот културен развој на Балканот, особено за продолжувањето на кирилометодиевската традиција преку учениците на светите браќа Кирил и Методиј во средновековната бугарска држава.
Во интервјуто тој се осврнува и на актуелната одлука на Грција за враќање на останките на цар Самуил во Бугарија.
Според него, иако станува збор за билатерално прашање меѓу Грција и Бугарија, неговото значење ги надминува границите на двете држави.
„Добар знак е што се обрнува внимание на минатото, на важни теми од минатото и што се бара баланс во нив“, вели Пириватрич.
Тој смета дека ваквиот пристап може да биде пример за професионално и одговорно разгледување на отворените историски прашања на Балканот.
Пириватрич е поранешен српски дипломат во Бугарија и Грција, а неговата книга за Самуиловата држава е преведена и на бугарски јазик.
