Московската епархија објави указ со кој од свештенички чин е лишен рускиот свештеник и психолог протојереј Андреј Лоргус. Одлуката беше објавена на официјалната интернет-страница на епархијата.
Отец Андреј Лоргус е познат како православен свештеник, психолог и автор на повеќе книги од областа на христијанската психологија. Тој служел во неколку московски храмови, меѓу кои храмот на пророк Илија, храмот на Света Троица во Чертаново и Високо-Петровскиот манастир. Неговото последно место на служба во Москва бил храмот на Свети Никола Мирликиски на Трите Гори.
Во 2018 година Лоргус преминал во статус „заштатен“ клирик на Московската епархија и се повлекол од активна служба. Во последните години живее во Бугарија.
Покрај свештеничката служба, тој е познат и по својата научна и образовна работа. Лоргус бил организатор и декан на Факултетот за психологија на Рускиот православен универзитет „Св. Јован Богослов“, како и основач и ректор на Институтот за христијанска психологија.
Од 2003 година е член на советот на Европското движење за христијанска психологија и антропологија и редовно учествува на меѓународни симпозиуми на оваа тема.
Во указот на Московската епархија се наведува дека лишувањето од свештенички чин е донесено поради наводно нарушување на повеќе канонски правила, меѓу кои правила на Трулскиот собор, Апостолските правила, како и одредби од Првиот и Четвртиот вселенски собор.
Според документот, на Лоргус му се припишуваат прекршувања како одвојување од епископот, учество во неканонски собири, самоволно напуштање на парохија, премин во друга црковна јурисдикција, занимавање со световни активности и навреда на клирици.
Самиот Лоргус изјавил дека, според него, вистинската причина за одлуката се јавните писма кои ги потпишал по февруари 2022 година.
Свештеникот има 69 години и веќе неколку години живее надвор од Русија. Според коментарите во јавноста, одлуката најверојатно нема директно да влијае на неговиот сегашен живот, бидејќи тој не служи во рамките на Бугарската православна црква.
Одлуката предизвика реакции во дел од црковната и академската јавност, каде што Лоргус е познат по својата работа во областа на христијанската психологија.
