Вселенскиот патријарх Вартоломеј I подвлече дека вистинската сила во црковниот живот произлегува од способноста на верниците и на црковните водачи да ја признаат својата грешка со искрено покајно срце, нагласувајќи ја потребата за помирување и единство меѓу православните христијани. Тој ги упати овие зборови по повод празникот Богојавление, при што истакнал дека молитвата и заедничката посветеност кон мирот треба да се видат најпрво во односите меѓу црквите.
Во својата порака, патријархот Вартоломеј го повика митрополитот Онуфриј и другите лидери да ја преиспитаат својата позиција за црковниот живот и да се стремат кон соработка и молитвено заедништво. Тој побара сите да се молат заедно „прво за црковниот мир“.
Тој нагласи дека помирувањето бара од вклучените страни да ја напуштат „опсесивната сигурност дека секоја страна сама ја поседува апсолутната вистина“. Како што нè учи искуството на Црквата, ваквите случаи бараат жртви за да се најде златна средина. Во црковниот живот, правдата секогаш им оди во прилог на слабите. Пристапот на Црквата кон правдата се разликува од оној на секуларниот систем. Во нашата вера, слабите се силни– оние што ги признаваат своите грешки со искрена намера да се покаат.
Патријархот Вартоломеј нагласи дека го осудува екстремизмот во Украина „од каде и да доаѓа“ и им советуваше на државните власти во земјата да се воздржат од мешање во внатрешните црковни работи. „Нудиме уште една можност и повикуваме на единство, а воедно се извинуваме ако нашето молчење им остави впечаток на некои дека имаме некаков друг став освен црковен во врска со целото ова прашање“, нагласил тој.
Патријархот исто така се осврна на длабоките страдања предизвикани од војната во Украина и изрази молитви за крај на конфликтот, повикувајќи ги сите верски и државни чинители да се воздржат од вмешување во внатрешните црковни прашања и да соработуваат за мир и единство.
