Во повеќе региони на Кина, специјалните полициски единици спровеле масовни апсења на лица поврзани со христијански заедници, според извештаи на независни медиуми и групи за следење на верските слободи. Случаите, според ChinaAid довеле до зголемена загриженост за состојбата со религиозните права и слободи во земјата.
Според достапните информации, апсењата биле насочени кон членови на некои невладини христијански организации и домаќинства кои практикувале вера надвор од државно регистрираните религиозни структури. Во неколку случаи, специјалците извршиле упади во домови на верници, при што повеќемина биле приведени и одведени без објаснувања за причините или правниот статус на постапките.
Христијанските организации што ја следат состојбата со верската слобода во Кина наведуваат дека ваквите дејства претставуваат дел од поширок тренд на ограничување на религиозните практики, кој вклучува и притисоци врз нерегистрани црковни групи, конфискации на имот, забрани за собирање и санкции против духовни лидери.
Експертите за човекови права истакнуваат дека, според кинеските закони и протоколи, владата има голема дискрециска моќ за регулирање и контрола на верските организации, но дека масовните апсења на верници предизвикуваат загриженост дека овие мерки може да ги надминат легитимните правни рамки и да се користат за репресија на мирни верски активности.
Засега официјалните кинески власти не објавиле јавни соопштенија за причините за апсењата или за наводните дејствија. Организации за заштита на човековите права и религиските заедници повикуваат на поголема транспарентност, правна заштита за приведените верници и осуда на секој облик на дискриминација или репресија против религиозните малцинства во Кина.
