Новата влада на Унгарија сигнализирала подготвеност да ѝ дозволи на Европска Унија да воведе санкции против поглаварот на Руска православна црква, патријархот Кирил, како и против други лица кои поранешниот премиер Виктор Орбан ги штител, објави Euronews.
Овој потег може да отвори пат еден од највлијателните верски лидери во Русија, со значително политичко влијание, да биде ставен на црната листа на ЕУ. Според европски претставници, веќе се подготвува „мини“ пакет санкции.
ЕУ првпат се обиде да го стави Кирил на санкциската листа во 2022 година, обвинувајќи го дека ја поддржува целосната инвазија врз Украина и шири ревизионистичка пропаганда. Но Унгарија, под водство на Орбан, го блокираше потегот, оценувајќи дека станува збор за прашање на верска слобода.
Во Брисел сега се надеваат дека наследникот на Орбан, Петер Маѓар, ќе дозволи донесување на одлуката. Маѓар настојува да се дистанцира од честото користење на правото на вето од страна на Орбан.
„Санкциите што би ја поткопале економската стабилност на Унгарија се апсолутно неприфатливи“, изјави Мартон Хајду, близок соработник на Маѓар и претседател на Комисијата за надворешни работи во унгарскиот парламент.
„Но, во случаи кога претходната влада ја користеше моќта на унгарската држава за склучување приватни договори, очекувам новата влада да не ги блокира заедничките напори на ЕУ за зголемување на притисокот врз Русија за завршување на оваа војна“, додаде тој.
Други руски личности првично биле ставени на санкциската листа, но подоцна биле отстранети по инсистирање на Орбан, меѓу нив министерот за спорт Михаил Дегтјаров и олигархот Вјачеслав Кантор. Сега тие повторно би можеле да бидат разгледани.
„Ревидирањето на имињата не е невообичаено“, изјавил дипломатски извор на ЕУ за Euronews.
Санкциите во ЕУ се носат едногласно, а списокот со предложени имиња може да се менува како што напредуваат преговорите. Словачкиот премиер Роберт Фицо, кој исто така користеше вето за да заштити некои руски поединци, не бил на власт кога ЕУ се обидела да го санкционира Кирил во 2022 година.
Дваесет и првиот пакет економски санкции се очекува да биде претставен во јуни, со цел конечно одобрување до 15 јули.
Искористувајќи го периодот по Орбан, ЕУ размислува и за промена на рокот за обновување на санкциите од шест месеци на една година, нешто на што Орбан жестоко се спротивставуваше за да го задржи своето влијание преку правото на вето.
