Предлогот на поранешниот поглавар на Исламската заедница во Босна и Херцеговина, Мустафа Цериќ, за формирање „Босанска православна црква“, предизвика силни и остри реакции од страна на Српската православна црква.
Идејата беше јавно изнесена неодамна и веднаш беше оценета како директен предизвик за српското православно паство и за епархиите што делуваат на територијата на Босна и Херцеговина. Фактот што ваков предлог доаѓа од претставник на друга верска заедница дополнително ги заостри реакциите, особено во контекст на чувствителните меѓунационални и меѓурелигиски односи во земјата, каде спомените од војната во 1990-тите сè уште се силно присутни.
Дополнително внимание привлекува и политичката биографија на Цериќ, кој во минатото беше кандидат за член на Претседателството на Босна и Херцеговина.
Епископот на Зворник и Тузла, митрополитот Фотиј, во јавен одговор истакна дека ваквата иницијатива „мириса на темјанот на Втората светска војна и на создавањето на познатата по злоделата држава Хрватска и на фиктивната Хрватска православна црква во 1942 година“, оценувајќи дека станува збор за историски опасен преседан. Тој потсети дека српската заедница во Босна и Херцеговина е призната со Дејтонскиот договор од 1995 година и дека Српската православна црква има легален и непрекинат статус.
Според Фотиј, предлогот на Цериќ не е чин на помирување, туку чекор што може да доведе до нови поделби. Тој нагласи дека црква поставена како слуга на државата не може да биде фактор на мир, туку напротив – производ на конфликт.
Со слична острина реагираше и епископот на Бихаќ и Петровац, Сергиј, кој оцени дека станува збор за опасна реторика мотивирана од политички интереси. Според него, „Босанска православна црква“ никогаш не постоела и не може да постои како проект на дневната политика, додавајќи дека Црквата опстојувала повеќе од два милениума, надживувајќи држави, империи и идеологии.
Епископот Сергиј ја повика Исламската заедница на Босна и Херцеговина јасно да се дистанцира од ваквите ставови, оценувајќи дека тие не можат да придонесат за хармоничен соживот меѓу верските заедници.
Во меѓувреме, од Бања Лука, седиштето на Република Српска, српскиот патријарх Порфириј упати порака за отфрлање на омразата и насилството и повика на заемно почитување и мирен соживот меѓу сите народи и верски заедници, нагласувајќи дека секој човек е дар од Бога и заслужува љубов и мир.
