Во неделата, на 31 октомври оваа година, ненадејно починал јеромонахот Филотеј Дохијарски. Отец Филотеј беше голем пријател на МПЦ-ОА и често пати доаѓаше во црквите и манастирите, вклучително и во Бигорската Обител.
Тој беше јеромонахот кој во 2017 година ја донесе во Струмица прекрасната икона – копија на чудотворната икона на Пресвета Богородица „Скоропослушница“, од светогорскиот манастир Дохијар.
Блаженоупокоениот јеромонах отец Филотеј Дохијарски е роден во Атина во 1963 година. Неговиот татко, Стилијан Пападопулос, е почесен професор на Богословскиот факултет во Атина. Отец Филотеј дипломирал на истиот факултет. Беше одличен познавач на византиската и на европската музика.
За монах бил потстрижен во 1985 година во светогорскиот манастир Дохијар, каде што непрестајно се подвизуваше во љубовта Христова сè до неговото упокојување.
Милозвучен и слаткогласен, тој беше протопсалт во хорот на неговата обител.
-Нека нашиот Спасител и Воскресител, Господ Исус Христос, му подари добар рај, вселувајќи ја неговата душа во небесните обители! Вечен му спомен!, велат од Бигроски.