На YouTube каналот на „Двери“ е објавено ново видео во кое се разгледува учеството на Бугарската патријаршија во повеќедецениската подготовка на Соборот на Православната црква, одржан на островот Крит во 2016 година.
Во видеото зборува проф. Иван Желев Димитров – долгогодишен професор по Новиот Завет, црковен јавен деец и непосреден учесник во предсоборните совещанија. Тој објаснува дека потпишувањето на завршните документи во јануари 2016 година било резултат на повеќе од шест децении подготовка, во која учествувале бројни клирици, богослови и научници.
Проф. Желев ги споредува напорите на учесниците во подготовката на соборот со мисијата на Мојсеј, кој го водел еврејскиот народ кон Ветената земја, но самиот не влегол во неа. „Така и јас работев со децении за подготовката на соборот, учествував во потпишувањето на конечните документи за неговото свикување, но никогаш не учествував на самиот собор“, вели тој.
Во разговорот се разгледуваат личности и настани од втората половина на 20. век, односите меѓу Помесните православни цркви во текот на меѓуправославните преговори, како и улогата на Москва и Вселенската патријаршија во процесот.
Во тричасовниот разговор со уредниците на „Двери“ – Златина Каравoлчева и Полина Спирова – проф. Желев зборува и за процеси од поновата историја на Бугарската православна црква, за својата работа како шеф на кабинетот на патријарх Максим, за неговата личност и за атмосферата во Бугарската црква во тоа време.
Видеото, снимено од Стефка Борисова, е дел од зборникот „Еден е нашиот Учител – Христос“, издаден по повод 80-годишнината на проф. Желев.
