Со празнична Вечерна богослужба и света архиерејска Литургија на Плаошник во Охрид беа одбележани празниците посветени на Свети Климент Охридски, светите Седмочисленици и светиот великомаченик Пантелејмон.
Прославата започна на 8 август, во манастирот „Свети Климент и Пантелејмон“ на Плаошник, каде што беше отслужена празнична Вечерна богослужба со која началствуваше митрополитот Дебарско-кичевски Георгиј.
Празничното чествување продолжи на 9 август со света архиерејска Литургија, со која началствуваше архиепископот Охридски и македонски и на Јустинијана Прва Стефан. На Литургијата сослужуваа митрополитот Дебарско-кичевски Георгиј и епископот Хераклејски Климент.
По завршувањето на Литургијата беше извршен чинот на Мал водосвет, по што беше прекршен празничниот колач.
Во рамките на празничната богослужба, архиепископот Стефан произнесе слово посветено на празникот и на духовното наследство на Свети Климент Охридски, светите Седмочисленици и светиот великомаченик Пантелејмон.
Празничното чествување на Плаошник и годинава собра верници кои дојдоа да се поклонат пред светите мошти и да земат учество во богослужбите посветени на светителите кои имаат особено место во духовната историја на Охрид и Македонската православна црква – Охридска архиепископија.
