Повторното отворање на Богословијата на Халки во Турција на крајот ќе зависи од политичката одлука на турското државно раководство, изјави турскиот министер за национално образование Јусуф Текин.
Во интервју за CNN Türk, Текин посочи дека неговото министерство веќе ги завршило подготовките за начинот на кој историското православно богословско училиште би можело да биде повторно отворено, доколку биде донесена политичка одлука за тоа. Тој нагласи дека прашањето не е само во надлежност на Министерството за национално образование, туку има пошироко значење за внатрешната и надворешната политика на Турција.
„Одлуката дали ќе биде повторно отворено или не е многу важна одлука за оваа земја во однос на надворешната и внатрешната политика. Политичките власти и државата ќе ја донесат таа одлука“, изјавил Текин.
Прашањето за Халки во последните месеци повторно доби динамика. Во јуни годинава Ердоган, според претходни извештаи, дал насока да продолжат разговорите за можностите за повторно отворање на училиштето, а во тек е и дијалог меѓу турското Министерство за национално образование, Советот за високо образование и Вселенската патријаршија.
Во меѓувреме, продолжува и обновувањето на историскиот комплекс на Халки. Според извештаите од септември, обновените објекти треба да бидат свечено отворени, но нивната инаугурација е одвоен процес од формалното повторно отворање на самата Богословија. Како една од разгледуваните можности се споменува нејзино функционирање како постдипломска установа или богословска семинарија. Богословијата на Халки е затворена од 1971 година, а нејзиното повторно отворање со децении е едно од главните барања на Вселенската патријаршија. Вселенскиот патријарх Вартоломеј во мај годинава изрази очекување дека обновувањето на комплексот ќе биде завршено во наредните месеци и најави дека, доколку се исполнат условите, свеченото отворање би можело да се одржи во септември 2027 година.
