Јордан ќе продолжи да го поддржува христијанското присуство на Блискиот Исток и да ја исполнува својата историска улога во заштитата на христијанските и муслиманските свети места во Ерусалим, порача кралот Абдула II на средбата со бугарскиот патријарх Даниил.
Средбата се одржала на 29 септември во палатата „Ал Хусејнија“ во Аман. На неа присуствувале и ерусалимскиот патријарх Теофил III, архиепископот Киријакополски Христофор, принцот Гази бин Мухамед, главен советник на кралот за верски и културни прашања и негов личен пратеник, како и неврокопскиот митрополит Серафим од бугарската црковна делегација.
Кралот Абдула II упатил и официјална покана до патријархот Даниил во 2030 година да учествува во одбележувањето на 2000 години од Крштевањето на Исус Христос кај Витанија од другата страна на Јордан.
Во своето обраќање, патријархот Даниил истакнал дека „Јордан има посебно место во секое православно бугарско срце“, изразувајќи благодарност за односот на јорданските власти кон христијанските заедници и светите места.
Тој посебно го издвоил и неодамнешното отворање на Меѓународниот православен универзитет кај местото на Крштевањето, оценувајќи го Јордан како „земја на мирот и разбирањето“ и како мост меѓу Светите земји и европската христијанска цивилизација.
На средбата било разговарано и за идејата за создавање бугарски поклоннички центар во Јордан, иницијатива која била отворена уште при посетата на принцот Гази бин Мухамед на Софија во април 2025 година.
Тогаш била разгледувана можноста за создавање место кое би им помагало на бугарските поклоници при посетите на историските и верските места во Јордан. Идејата подоцна била поврзувана и со можноста за обезбедување простор на источниот брег на реката Јордан за таков центар.
Засега нема дополнителни информации за реализацијата на оваа иницијатива.
Во рамките на посетата на Јордан, патријархот Даниил се поклонил и на местото на Крштевањето Христово и ги посетил древните православни заедници во Мадаба и Фухејс.
