Митрополитот Нектариј Крфски, Паксоски и Диапонтиски Острови е одликуван со Орденот „Св. Серафим Саровски“ од втор степен од патријархот московски и на цела Русија Кирил, како признание за неговиот придонес во развивањето и зајакнувањето на односите меѓу Руската православна црква и Црквата на Грција.
Одликувањето му беше врачено на 19 август, по светата Литургија по повод празникот Преображение Господово во храмот „Христос Спасител“ во Москва.
Митрополитот Нектариј сослужуваше со патријархот Кирил и архиереи на Руската православна црква. Тој во моментов престојува во Русија како предводник на делегација на својата митрополија, која ја придружува десната рака на свети Спиридон Тримитунтски, донесена од Крф во Русија за поклонување на верниците.
При врачувањето на одликувањето било истакнато дека митрополитот Нектариј има значаен придонес во развивањето и зајакнувањето на пријателските односи меѓу Руската православна црква и Црквата на Грција.
Одликувањето има особено значење имајќи ги предвид нарушените односи меѓу двете цркви.
Руската православна црква во октомври 2019 година ја прекина евхаристиската заедница со Црквата на Грција, откако Светиот синод на Грчката црква ја призна автокефалноста на Православната црква на Украина.
Митрополитот Нектариј: „Вие навистина правилно го проповедате словото на вистината“
Заблагодарувајќи му се на патријархот Кирил за одликувањето, митрополитот Нектариј изразил радост што има можност заедно со поглаварот и архиереите на Руската православна црква да го прослави празникот Преображение.
Тој потсетил дека го познава патријархот Кирил уште од времето кога бил претседател на Одделот за надворешни црковни односи на Московската патријаршија и кога го посетил Крф.
Митрополитот Нектариј во своето обраќање го споредил Кирил со поранешниот архиепископ атински и на цела Грција Христодул, истакнувајќи дека и двајцата, според него, во тешки времиња знаеле „правилно да го проповедаат словото на вистината“.
Тој истакнал и дека патријархот Кирил, според неговото мислење, привлекува луѓе кон Црквата, особено младите.
Кирил доби највисоко одликување од Крфската митрополија
Од своја страна, митрополитот Нектариј на патријархот Кирил му го врачил највисокото одликување на Светата митрополија Крфска – Орденот „Златен крст со ѕвезда на свети Спиридон“.
Патријархот Кирил ја истакнал радоста од присуството на грчката делегација и особено значењето на заедничката молитва.
„Се радуваме што денес нашите грчки браќа ја отслужија оваа света Литургија заедно со нас и што имавме можност заедно да се молиме“, рекол патријархот московски.
По свеченоста, патријархот Кирил се сретнал со митрополитот Нектариј и членовите на грчката делегација, при што биле разменети пригодни подароци.
Посетата на грчката делегација на Москва и заедничкото сослужување на митрополитот Нектариј со патријархот Кирил претставуваат значаен јавен сигнал во односите меѓу Руската православна црква и Црквата на Грција, кои остануваат оптоварени со несогласувањата околу признавањето на Православната црква на Украина.
