Министерството за земјоделство и храна на Бугарија ќе инвестира 62,5 милиони евра во активности поврзани со обновување на храмови и манастири во руралните подрачја на земјата, пишува hristianstvo.bg.
Средствата се насочени кон зачувување на духовното и културното наследство и подобрување на условите за живот во помалку населените региони. Ова стана јасно за време на посетата на министерот за земјоделство и храна Иван Христанов на Елешничкиот манастир „Света Богородица“ кај селото Елешница, Софиска област.
Според зборовите на министерот, храмовите низ вековите не биле само духовни центри, туку и важна потпора за егзистенцијата и животот на локалните заедници. Тој нагласи дека во многу населени места црквата играла клучна улога во зачувувањето на општественото ткиво.
Христанов посочи дека средствата се обезбедуваат преку интервенцијата „Зачувување на духовниот и културниот живот на населението во руралните подрачја“ од Стратешкиот план за развој на земјоделството и руралните подрачја 2023–2027 година. Преку неа се финансираат активности за реставрација, поправка и реконструкција на верски објекти, со цел да се зачува културниот идентитет и да се поттикне животот во руралните средини.
Министерот исто така ја истакна улогата на ваквите инвестиции во ограничување на иселувањето и справување со демографските предизвици во земјата.
Од своја страна, иконом Дилјан Цветков од Софиската света митрополија ѝ се заблагодари на државата за поддршката во одржувањето и обновувањето на храмови и манастири, кои, според него, остануваат важни духовни потпори за луѓето во тешки моменти.
За време на посетата, министерот беше пречекан од игуменот на Елешничкиот манастир, иконом Серафим Јанев, свештеникот Ангел Воденичаров од работната група на Светиот синод, како и претставници на Врачанската, Видинската и Старозагорската митрополија.
/hristianstvo.bg
