Комисијата за односи со верските заедници со предлог до Министерството за образование и Владата, верското образование да биде дел од задолжителната наставна програма од прво одделение па се до крајот на средното образование.
Предлогот е поддржан од сите пет уставно признаени верски заедници во Македонија како и од Асоцијацијата на вероучители. Овој предлог го вклучува верското образование во предметите етика, етика на религии и културно и религиозно наследство, посочи Оливера Трајковска, директор на Комисијата за односи со верските заедници.
Почитувањето на моралните норми на кои пред се учи верското образование може само да биде од полза за општеството а во никој случај на штета, додаде Трајковска, која рече и дека вероучителите трпат голема штета изминатава деценија од законските измени во образованието.
Од МОН за ТВ 24 велат дека предлогот ќе се разгледува наредната недела.
Министерство за образование и наука
– Предлогот е примен во министерството. Наредната недела ќе имаме состаноци на кои ќе се дискутира и разгледува истиот.
Во духот на соживот и заедништво, денеска на заедничко утринско кафе седнаа Архиепископот г.г Стефан, Реисот Ул Улема Шакир ефенди Фетаи од ИВЗ, претседателот на Еврејската заедница Пепо Леви, Бискупот на Католичката црква мон сињор Киро Стојанов и Пасторот на Евангелистичко-методистичката црква Марјан Димов. Од Комисијата за средбата изјавија дека верските лидери меѓу себе имаат блиски односи преку кои можат да разговараат за горливи прашања без да се создаде тензија а нивниот пример го следат младите верници.
Конфликтите во нашето општество се политички сценарија, ниту една вера не промовира насилство и поделби, велат од Комисијата за денешното заедничко кафе помеѓу верниците од петте уставно признаени верски заедници.
/ТВ24
