Рускиот претседател Владимир Путин ја нарече војната во Украина „света мисија“ во своето обраќање по повод православниот Божик, известува The Independent, оценувајќи дека Русија води борба за зачувување на „традиционалните духовни и морални вредности“. „Денес го славиме прекрасниот, светол празник на Христовото раѓање. И често го нарекуваме Господ Спасител, бидејќи Тој еднаш дојде на Земјата да ги спаси сите луѓе. Исто така и војниците, војниците на Русија, секогаш ја исполнуваат токму оваа мисија, според Божјата заповед – одбраната на Татковината, спасението на Татковината и нејзиниот народ. И цело време Русија се однесувала кон своите војници вака, како кон тие кои по Божја заповед ја исполнуваат оваа света мисија“, изјавил Путин.
Во божикната порака, упатена до верниците и објавена преку официјални државни канали, Путин истакна дека, според него, конфликтот во Украина има не само политичка и безбедносна, туку и духовна димензија. Тој нагласил дека Русија, како што рече, се спротивставува на западниот модел на вредности, кој го опиша како „деструктивен“ и „туѓ на православната цивилизација“.
Путин тврдеше дека руската држава и општество се повикани да го заштитат историскиот и духовниот идентитет на народот, додавајќи дека руската православна традиција има централна улога во таа мисија. Во обраќањето, тој не повика директно на прекин на огнот, туку ја оправда продолжената воена ангажираност како неопходна и легитимна.
Изјавата доаѓа во време на засилени борбени дејства во Украина и предизвика реакции кај меѓународната јавност, особено поради употребата на религиозна реторика за оправдување на воениот конфликт. Дел од аналитичарите оценуваат дека ваквите пораки дополнително ја продлабочуваат поларизацијата и го комплицираат секој обид за дипломатско решение.
Во меѓувреме, голем број верски и граѓански организации повторно апелираа религијата да не се користи како средство за легитимирање на насилство и војна.
