Во понеделник беше потпишан договор за набавка на 15 автобуси и нивно бесплатно предавање на Националната гарда на земјата од страна на Кипарската црква. Тие ќе се користат за безбедно превезување на војниците од Националната гарда до и од нивните единици. Договорот беше потпишан од кипарскиот архиепископ Георги, министерот за одбрана Василис Палмас и претставник на компанијата-изведувач. На церемонијата присуствуваше, меѓу другите, и началникот на Националната гарда, генерал-потполковник Емануил Теодору.
Во изјава за време на церемонијата, која се одржа во Архиепископијата, архиепископот Георги нагласи дека Кипарската црква, колку што може и во рамките на своите можности, ги поддржува потребите на Националната гарда. Од своја страна, министерот за одбрана му вети на архиепископот дека, во рамките на можностите, „ќе направиме сè што е можно за да ја зајакнеме одбранбената заштита на земјата на највисоко ниво, сè додека постои окупација и додека турските сили се наоѓаат во северниот дел на нашата татковина, како и да ја засилуваме одвраќачката моќ на државата“.
Според архиепископот Георги, „Православната црква секогаш ги благословувала и ги благословува одбранбените и ослободителните борби и се моли Бог да му дарува победи на благочестивиот народ, бидејќи кога тој е потчинет на туѓинци и иноверци, се доведува во опасност не само неговото национално постоење, туку и неговата вера“.
„Во тој контекст ја одржуваме и денес оваа церемонија за потпишување на договорот за набавка на автобуси од страна на Кипарската црква, по одлука на Светиот синод, и нивно предавање на Националната гарда“, додаде тој. „Би сакале да сме во подобра економска состојба за да финансираме и други нивни потреби, но правиме колку што можеме“, нагласи архиепископот.
Од своја страна, министерот за одбрана изјави дека „е добро позната чувствителноста и грижата што Кипарската црква секогаш ги покажувала кон прашањата поврзани со нашите национални интереси, особено сегашниот архиепископ“. Тој му се заблагодари на архиепископот за посебното внимание што го посветува на прашањата што се однесуваат на Националната гарда и Министерството за одбрана.
/dveri.bg
