Во пресрет на денешната посета на Вселенскиот патријарх Вартоломеј на Бугарија, во бугарските православни кругови продолжуваат реакциите на петицијата против неговото доаѓање. Игуменот на Германскиот манастир „Свети Јован Рилски“, отец Пимен, ги критикуваше христијаните што се вклучиле во иницијативата, оценувајќи дека дел од нив несвесно служат на туѓи интереси.
Во проповедта од 11 октомври, отец Пимен ја опиша нивната активност со изразот „корисни идиоти“, предупредувајќи дека зад иницијативата стојат верници кои, според него, не ја разбираат целосно нејзината последица врз црковното единство.
Тој оценил дека меѓу потписниците има приврзаници на старостилството, но и нови верници кои сè уште не се доволно утврдени во верата и затоа лесно подлегнуваат на манипулации.
Пимен посебно ги отфрлил обидите иницијативата да се поврзува со монасите од Зографскиот манастир на Света Гора. Според него, игуменот на Зограф, архимандритот Гавриил, не учествувал во петицијата, ниту им дал благослов на монасите да се вклучат во неа.
Според игуменот, петицијата внесува немир и забуна во Бугарската православна црква и го става во непријатна положба патријархот Даниил, како и другите бугарски архиереи.
Тој потсетил дека дел од денешните противници на посетата со воодушевување го поздравиле изборот на Даниил за бугарски патријарх, гледајќи во него Божји знак. Сега, според Пимен, истите луѓе со своите постапки оставаат впечаток дека го доведуваат во прашање неговото православие и сопствената способност да ја толкува верата.
Посетата на Вартоломеј, предвидена за 17 и 19 октомври, се одвива во чувствителен момент за односите во православниот свет, особено поради несогласувањата околу украинското црковно прашање и улогата на Вселенската патријаршија.
Реакцијата на отец Пимен покажува дека отпорот кон посетата не доаѓа само од надворешни критичари на Вселенската патријаршија, туку предизвикува и несогласувања во самата бугарска црковна средина.
