Папата Лав XIV упати повик Европа повторно да ги открие своите христијански корени, оценувајќи дека токму тие се важни за разбирањето на европската цивилизација и за нејзината иднина.
Говорејќи на средбата „Корените на Европа за мир и единство“, Папата истакна дека христијанското наследство на континентот не претставува само дел од неговото минато, туку и извор на вредности кои и денес можат да придонесат за мир, единство и заеднички живот.
„Не можеме да зборуваме за Европа без да го споменеме христијанството“, порача Лав XIV, нагласувајќи дека признавањето на христијанските корени на Европа помага појасно да се разбере дека „отвореноста кон трансцендентното отсекогаш била составен дел од човечката личност и жив извор на цивилизацијата“.
Европа не е само географија, туку цивилизациско наследство
Папата Европа ја опиша како „културна и историска реалност“, а не само како географски простор. Според него, континентот напредувал тогаш кога знаел да го преземе најдоброто од своето минато и повторно да го осмисли преку средба со другите цивилизации.
Меѓу темелите на европската цивилизација Лав XIV посебно го посочи свети Бенедикт, кого го опиша како еден од големите „татковци основачи“ на Европа.
Монашкото наследство, според Папата, оставило длабока трага во грижата за сиромашните, болните и старите, во образованието и развојот на универзитетите, болниците и медицината, но и во архитектурата, инженерството, науката, правото и организацијата на градовите и државите.
„Без ова монашко влијание, европската цивилизација каква што ја познаваме не би постоела“, рече Лав XIV.
Во своето обраќање Папата се осврна и на Роберт Шуман и Алчиде де Гаспери, кои, заедно со други европски политичари, учествувале во создавањето на современиот европски проект.
Според Лав XIV, од христијанското наследство Шуман и Де Гаспери ги црпеле вредностите на еднаквоста, достоинството на трудот, вредноста на човечката личност, личната одговорност, почитувањето на законот, љубовта кон убавината и посветеноста на вистината и правдата.
Тој истакна дека овие вредности не треба да се разбираат исклучиво како израз на религиозна посветеност. Напротив, свеста за христијанскиот придонес кон европската цивилизација, според него, овозможува подобро разбирање на човекот и на неговата отвореност кон трансцендентното.
Лав XIV ја поврза оваа тема и со современите предизвици пред Европа, особено со миграцијата и потребата од интеграција на луѓето кои доаѓаат од други средини.
Тој повика на почитување на верската слобода и на соработка меѓу Црквата и државата, посочувајќи ги човековото достоинство, слободата, демократијата, еднаквоста и владеењето на правото како основа за живот во мултикултурно општество.
Папата истакна дека универзалниот карактер на европските вредности овозможува дијалог меѓу различните култури и придонесува кон градењето помирни општества.
Според Папата, искуството на Европа по Втората светска војна покажува дека различните интереси и ставови можат да се усогласуваат преку средба и дијалог, наместо преку конфликт.
