Монах загина, а уште четворица монаси и искушеници се ранети во серија напади со дронови врз Григориевскиот Бизјуков машки манастир во селото Червониј Мајак во Херсонската област, Украина.
Нападите се случиле на 19 септември, а за нив известија Информативниот центар на Украинската Православна Црква и Херсонската областна воена администрација.
Според Херсонската епархија, првично беспилотни летала ја нападнале територијата на манастирот. Во нападот тешко бил ранет 71-годишниот монах Мојсеј, најстариот жител на манастирот, кој подоцна им подлегнал на повредите.
Од Херсонската областна воена администрација соопштија дека нападот бил извршен околу 15 часот со FPV-дрон.
По првиот напад, монасите процениле дека останувањето во манастирот не е безбедно. Според епархиското соопштение, тие го искористиле привременото затишје и пеш тргнале кон соседното село.
Групата повторно била нападната со дрон за време на движењето, при што биле ранети четворица монаси и послушници. Херсонската епархија ги наведува како архимандрит Кукша и послушниците Александар, Олег и Александар.
Според Херсонската областна воена администрација, ранетите се на возраст од 31, 51, 51 и 53 години, а според првичните информации се здобиле со минско-експлозивни повреди.
Херсонскиот и Таврички митрополит Јован изразил сочувство до блиските на починатиот монах Мојсеј и ги повикал верниците на молитва за закрепнување на ранетите.
Ова не е прв напад врз манастирскиот комплекс по почетокот на војната. Во февруари 2024 година, при руски гранатирања биле оштетени објекти во комплексот, меѓу кои покривот и фасадата на еден од храмовите. Нов напад врз манастирската територија бил регистриран и во април 2025 година.
Григориевскиот Бизјуков манастир е една од постарите православни обители во јужна Украина. Почетоците на манастирот датираат од 1782 година, а во 1803 година станал самостоен машки манастир.
Во текот на XIX и почетокот на XX век, во манастирот функционирале училиште, болница, гостилница и пастирско-мисионерски курсеви, кои подоцна биле преобразувани во духовна семинарија. Манастирот бил затворен од советските власти во 1920-тите години, при што дел од комплексот бил разрушен.
Црковниот живот во манастирот бил обновен во 1991–1992 година.
