Во Украинската православна црква – Московска патријаршија (УПЦ-МП) повторно се отвора прашањето за односите со Руската православна црква, откако во една од епархиите повторно започнало литургиското споменување на рускиот патријарх Кирил.
Станува збор за Балтичката и Ананиевската епархија, каде што надлежниот архиереј, митрополитот Олексиј (Гроха), повторно започнал да го споменува патријархот Кирил за време на богослуженијата и при архиерејските посети на парохиите.
Според писмо испратено од свештенослужители до митрополитот Онуфриј, оваа практика била прекината во 2022 година, но сега повторно е воспоставена. За дел од свештенството тоа не е само богослужбено прашање, туку потег кој отвора дилеми за идниот курс на епархијата и нејзиниот однос кон Московската патријаршија.
Свештениците наведуваат дека верниците веќе почнале да бараат од нив објаснување дали повторното споменување на патријархот Кирил значи промена на досегашната позиција и евентуално враќање кон поцврсти врски со Руската православна црква.
Прашањето е особено чувствително поради ставот на Московската патријаршија кон руската агресија врз Украина. Токму по почетокот на целосната руска инвазија во 2022 година, односите меѓу УПЦ и РПЦ станаа едно од најконтроверзните прашања во украинскиот православен свет.
Во писмото до митрополитот Онуфриј, духовниците бараат архипастирско појаснување за тоа дали повторното споменување на Кирил претставува индивидуална одлука на епархискиот архиереј или е дел од поширока промена на црковниот курс.
Авторите на писмото не се потпишале со имиња, наведувајќи страв од можни репресии од страна на митрополитот Олексиј.
Текстот е објавен од Религиозно-информативната служба на Украина (RISU), а според доц. д-р Сергеј Шумило, директор на Меѓународниот институт за атонско наследство, писмото било добиено од свештенослужители на УПЦ-МП од Одеската област. Тој наведува дека неговата автентичност била потврдена од неколку архиереи на УПЦ-МП.
Засега нема наведена официјална реакција од митрополитот Онуфриј или од митрополитот Олексиј во врска со писмото.
/hristianstvo.bg
