Рашко-призренската епархија на Српската православна црква најостро го осуди инцидентот во Липљан, Косово и Метохија, каде што, според нејзиното соопштение, две лица од албанска националност поставиле знамиња на ОВК и на Република Албанија на оградата на црковниот двор во кој се наоѓаат два православни храма.
Станува збор за средновековниот храм „Воведение на Пресвета Богородица“ од XIV век и храмот посветен на светите маченици Флор и Лавр.
Според Епархијата, инцидентот се случил во вечерните часови на 10 август, кога припадници на Косовската полиција ги затекнале двајцата при поставувањето на знамињата. Тие биле приведени, а знамињата биле отстранети од оградата на црковниот имот.
Од Рашко-призренската епархија најавуваат дека, откако официјално ќе ги добијат податоците за идентитетот на приведените лица, ќе поднесат кривична пријава до надлежното обвинителство.
Епархијата бара случајот да не биде третиран само како обичен прекршок или чин на вандализам, туку да се испита дали станува збор за поттикнување етничка и верска омраза, заплашување на преостанатите Срби и намерно сквернавење на заштитено верско и културно наследство.
Во соопштението се потсетува дека слични инциденти во истиот црковен комплекс се случиле и во јуни 2023 и декември 2025 година, кога било отстранувано знамето на Српската православна црква. Според Епархијата, неоткривањето и неказнувањето на сторителите во претходните случаи создало чувство на неказнивост.
Од КФОР, ЕУЛЕКС, ОБСЕ, Европската Унија и дипломатските претставништва Рашко-призренската епархија очекува јавна осуда на инцидентот, внимателно следење на постапката и конкретно дејствување за спречување на слични случаи.
Воедно, Епархијата ги повика преостанатите Срби во Липљан и околината да останат мирни и достоинствени и да не подлегнуваат на провокации.
„На омразата нема да одговориме со омраза, но нема ни да молчиме пред неправдата“, се наведува во соопштението.
