Вселенскиот патријарх Вартоломеј на 7 август вечерта предводеше Молебен канон кон Пресвета Богородица во храмот „Свети Јован Рилски Чудотворец“ на бугарската православна заедница во Истанбул, во дворот на Бугарската егзархија во населбата Шишли.
Во своето слово Вартоломеј зборуваше за почитта на христијаните кон Пресвета Богородица, но и ја објасни причината поради која годинашната посета на бугарскиот храм се одржува во август, наместо во октомври, околу празникот на Свети Јован Рилски.
Тој најави дека во октомври ќе ја посети Бугарија по официјална покана на Светиот синод на Бугарската православна црква, каде што ќе учествува на свеченостите во Рилскиот манастир и Софија по повод 1150-годишнината од раѓањето и 1080-годишнината од упокојувањето на Свети Јован Рилски Чудотворец.
Вартоломеј сегашната посета на бугарскиот храм во Истанбул ја опиша како своевидна најава за претстојните чествувања во Бугарија и уште едно сведоштво за почитта на Цариградската црква кон Свети Јован Рилски.
Во своето слово Вартоломеј се осврна и на историските и духовните односи меѓу Вселенската патријаршија и Бугарската православна црква, опишувајќи ги како „врска на крвта и на Духот“ и како повеќевековно историско и духовно сродство.
Тој нагласи дека токму од Константинопол дошло просветувањето на бугарскиот народ во православната вера и порача дека Вселенската патријаршија „не престанала и нема да престане со мајчинска грижа да ја прегрнува својата возљубена ќерка – Црквата во Бугарија“.
Како пример за овие односи, патријархот ги посочи и своите лични врски со бугарскиот патријарх Даниил. Тој потсети на неговата посета на островот Имврос на 11 јуни годинава, кога бугарскиот и романскиот патријарх учествуваа во одбележувањето на именденот на Вартоломеј.
Вселенскиот патријарх посебно се осврна на еден личен момент од посетата. По предлог на бугарскиот патријарх Даниил, на гробиштата кај храмот „Свети Георгиј“ во родното село на Вартоломеј на Имврос, Свети Теодори, бил отслужен трисагиј за неговите родители Христо и Меропи и за неговата покојна сестра Захаро.
Вартоломеј му се заблагодари на Даниил за овој гест, кој, како што рече, ги надминува рамките на црковниот протокол и претставува „дело на братство“, сведочејќи за љубовта меѓу двете цркви.
Посебно внимание во словото патријархот посвети на бугарскојазичната православна заедница во Истанбул, која канонски се наоѓа под омофорот на Вселенската патријаршија.
Вартоломеј нагласи дека оваа припадност не значи губење на нејзиниот идентитет. Според него, Цариградската црква се стреми да ги зачува јазикот, богослужбените традиции и културните особености на различните православни заедници што се наоѓаат под нејзина пастирска грижа.
Како примери ги посочи православните верници со украинско, романско, руско и грузиско потекло кои живеат во Истанбул.
На богослужението присуствуваа генералниот конзул на Бугарија во Истанбул Васил В’лчев, претседателот на Бугарската федерација за таеквондо и потпретседател на Бугарскиот олимписки комитет Слави Бинев, поклоници од Бугарија и членови на бугарската православна заедница во Истанбул.
