Лефортовскиот суд во Москва ја потврди пресудата против московјанката Ксенија Белоусова, која направила наргиле користејќи велигденски колач (кулич), пишува РИА Новости.
„Пресудата… останува непроменета, а жалбата се одбива“, одлучил судот.
Претходно Белоусова ја призна вината и изрази каење, но поднесе жалба на пресудата сметајќи дека казната е престрога.
„Делото што го извршив е недозволиво во денешното општество. Искрено жалам што го направив тоа, се каам и сакам да им се извинам на сите што ги навредив. Во истражниот затвор се запознав со голем број жени, разговарав со нив и сфатив дека повеќе не сакам да се занимавам со криминални дејствија, бидејќи тоа ги уништува животите, вклучително и животите на најблиските“, изјави обвинетата пред судот.
Обвинителката побара пресудата да остане во сила, нагласувајќи дека Белоусова, и по првата осуда, „не тргнала по патот на исправување и не извлекла поука“.
Во април Белоусова во бар во центарот на Москва направила од велигденски колач чаша за наргиле. Перформансот го снимила на видео и го објавила на социјалните мрежи. Против неа беше покрената кривична постапка поради навреда на чувствата на верниците.
Судот во Москва ја осуди Белоусова на три години и 25 дена затвор, земајќи ја предвид и претходната пресуда. Претходно таа добила условна казна од три години, со ист пробен рок, поради поседување повеќе од пет грама мефедрон.
Практично, судијата за навредата на чувствата на верниците ѝ изрекол казна од 200 часа општокорисна работа, но поради претходната осуда, вкупната казна била значително построга. Белоусова беше приведена веднаш во судницата.
По изрекувањето на пресудата, обвинетата испратила писмо со покајание до Руската православна црква. Како одговор, Црквата подготвила барање до судот за ублажување на казната, предлагајќи наместо затвор да ѝ биде определен некаков вид работа во една од социјалните установи на Руската православна црква.
