Претседателот на Србија Александар Вучиќ изјави дека разбира зошто поранешниот претседател на Црна Гора Мило Ѓукановиќ „ја мрази“ Српска православна црква, но додаде дека повеќе го интересира ставот на актуелната власт во Подгорица и зошто таа не зборува за ова прашање.
Oдговарајќи на изјавата на Ѓукановиќ дека СПЦ е „параполитичка организација“ која добила значајна политичка улога од Србија, Вучиќ рече дека со години во Црна Гора се водела операција за Српската православна црква да биде претставувана на поинаков начин.
„Многумина ја прифаќаа идејата таа да се нарекува православна црква, православна црква во Црна Гора или православна црква на Црна Гора, без да се споменува дека е Српска православна црква. Потоа требаше да се донесат и такви закони и таа приказна да заврши“, изјави Вучиќ.
Тој додаде дека многу народи на просторот на поранешна Југославија го граделе својот идентитет врз антисрпски позиции и преку спротивставување на СПЦ.
„Колку пати пред десет, осум или пет години слушавте да не велат ни Митрополија црногорско-приморска на Српската православна црква, туку само Митрополија црногорско-приморска? Милион пати, во нивните медиуми, па дури и кај нас, затоа што наседнувавме на тие трикови и не разбиравме што прават“, рече српскиот претседател.
Вучиќ изјави дека го разбира политичкиот став на Ѓукановиќ, иако, како што рече, целосно е против него.
„Како што ние не можеме да ги прифатиме оние што измислуваат дека претставуваат некаква црква и сакаат да се претстават како легална и легитимна црква, а се регистрирани како невладина или општинска организација. Јас го разбирам неговиот политички став. Дали се согласувам? Апсолутно не“, изјави Вучиќ.
На крајот, тој повтори дека повеќе го интересира што мисли актуелната власт во Црна Гора и зошто не се изјаснува по ова прашање.
