Со поддршка на Министерството за култура, продолжува конзервацијата и санацијата на црквата „Св. Никола“ во с. Манастир, Мариово, значаен споменик на културата.
Во рамките на конзервацијата и санацијата на ова вредно културно наследство од византискиот период која се одвива во неколку фази, стручните екипи на НУ Завод за заштита на спомениците на културата и музеј – Прилеп ќе работат на конзервација на фрескоживописот односно на отстранување на наталожените нечистотии, додека во третата фаза ќе се изврши консолидација на оштетениот слој со ретуш во боја, соопшти Министерството за култура.
Претходно беше извршена превентивна заштита со отстранување на механичките оштетувања на живописот, како конструктивна консолидација на темелите на црквата од западната страна, беа поставени потпорни ѕидови, а се изврши и зацврстување на темелите на црквата од источната, северната и од јужната страна.
Црквата „Св. Никола“ во с. Манастир, Мариово, според архитектурата претставува трикорабна базилика изградена во 1095 година, а денешниот изглед го добила во 1266 година. Црквата, во светски рамки, претставува редок пример на византиската уметност во поглед на исклучителниот архитектонскиот израз и уникатниот фрескоживопис.
/МИА
