Грузиски митрополит: Црквата станува зависна од државата, власта го исцрпи својот политички капацитет

Date:

Share post:

Митрополитот Руиски и Урбниски, Јов Акиашвили, упати остра критика кон грузиската влада, предупредувајќи дека сè поголемото финансиско поврзување на Црквата со државата ја загрозува нејзината независност и слободата на свештенството јавно да зборува за општествените и политичките проблеми.

Во проповедта одржана на 10 ноември во катедралниот храм во Урбниси, а објавена следниот ден на страниците на неговата епархија, митрополитот оцени дека актуелната власт го исцрпила својот политички потенцијал и дека на земјата ѝ е потребно поинакво управување.

„Денес гледаме дека нашата влада е безверна и далеку од Црквата. Денес постои обид за спојување на Црквата и државата. А како се изразува тоа? Преку давањето финансиски средства на Црквата. Кога свештенослужителите се чувствуваат удобно, станува многу тешко да се признае вистината“, рекол митрополитот Јов.

Според него, државното финансирање создава зависност која може да ја попречи слободата на црковните великодостојници да ги изнесуваат своите ставови за постапките на власта.

„Висок црковен великодостојник не може да ја каже вистината и да ги изрази своите ставови за случувањата, бидејќи во најголем дел е финансиран од државата“, предупредил Јов.

Тој предложил наместо директно државно финансирање, поголема улога да имаат доброволните прилози на верниците, посочувајќи го моделот на издвојување десет проценти од нивните приходи. Истовремено, побарал целосна транспарентност во располагањето со црковните средства, така што секој верник ќе може да знае за што се трошат парите наменети за Црквата.

Митрополитот упатил критики и кон дел од црковната хиерархија, оценувајќи дека одредени свештенослужители почнале да наликуваат на државни функционери во начинот на живот.

„Тешко е верниците да разберат кога им проповедате да ја поднесуваат сиромаштијата, да им помагаат на оние што страдаат, а самите не го практикувате тоа“, рекол тој.

Критики за корупцијата, коцкањето и демографската криза

Значителен дел од проповедта бил посветен и на состојбите во грузиското општество. Митрополитот Јов предупредил на ширењето на зависностите од дрога и коцкање, корупцијата, иселувањето на младите и демографскиот пад.

Тој ја критикувал политиката на владата во однос на ширењето на казината и коцкањето, посочувајќи дека економскиот развој не може да се мери само преку изградбата на нови објекти, додека населението се намалува, а младите ја напуштаат земјата.

Во своето обраќање се осврнал и на објавените документи од 2021 година, за кои се тврдеше дека содржат информации за следење на високи претставници на Грузиската православна црква од страна на државните безбедносни служби. Според митрополитот, објавувањето на тие материјали било насочено кон нарушување на угледот на Црквата, а тој го поставил и прашањето зошто досега не се утврдени одговорните за нивното создавање и распространување. Автентичноста и потеклото на сите објавени материјали не се целосно утврдени.

Најдиректниот дел од проповедта се однесувал на политичката одговорност на актуелната влада, предводена од партијата „Грузиски сон“.

„Се уверивме дека оваа влада целосно го исцрпи својот потенцијал. Како што е вообичаено во светот, владите се менуваат, така и ние во иднина треба да избереме подобра влада“, рекол митрополитот Јов.

Тој оценил дека во државната политика повеќе не се препознава доволна грижа за националните интереси и дека економската моќ не може да биде единствен приоритет на власта.

Изјавите на митрополитот предизвикале реакции кај претставниците на владејачката партија. Пратеникот на „Грузиски сон“, Леван Мачаваријани, изјавил дека е разочарувачки кога висок црковен великодостојник од црковниот амвон упатува политички пораки, оценувајќи ги неговите тврдења како неточни и оддалечени од реалноста. Тој истовремено изјавил дека власта е подготвена да разговара со црковните претставници за сите прашања што ги сметаат за проблематични.

Од друга страна, митрополитот сванетски Иларион застанал во одбрана на Јов, оценувајќи дека гласот на Црквата не може да биде замолчен преку материјална благосостојба, државно финансирање или други механизми на притисок.

Црквата и државата во Грузија

Изјавите на митрополитот Јов имаат особена тежина во грузискиот контекст, каде што Православната црква традиционално има значително влијание врз општествениот и политичкиот живот.

Од доаѓањето на „Грузиски сон“ на власт во 2012 година, односите меѓу владата и Црквата се развиваа во знакот на блиска соработка, при што државната финансиска поддршка претставуваше еден од важните елементи на тие односи.

Митрополитот Јов, кој беше меѓу тројцата кандидати за нов патријарх на Грузиската православна црква по смртта на патријархот Илија II, и во претходните години јавно изнесуваше критички ставови кон политичките случувања во земјата.

Неговата последна проповед, сепак, е значајна затоа што не се ограничува на критика на поединечни владини политики, туку го отвора прашањето за институционалната независност на Црквата, нејзината финансиска зависност од државата и одговорноста на црковната хиерархија пред верниците.

Според митрополитот, Црквата мора да ја зачува својата слобода да ја кажува вистината, дури и кога нејзините ставови се спротивставени на политиката на актуелната власт.

LEAVE A REPLY

Please enter your comment!
Please enter your name here

spot_img