Со меѓународен симпозиум под наслов „Бог, татковина, човек“, Грузија одбележува 1.700 години од прогласувањето на христијанството за државна религија. На собирот, на кој се обратија патријархот на Грузија Шио III, премиерот Иракли Кобахидзе и претседателот Михаил Кавелашвили, покрај значењето на православието за грузискиот идентитет, во фокусот беа и повиците за помирување со жителите на Абхазија и регионот Цхинвали.
Патријархот Шио III во своето обраќање упати порака за мир и обновување на единството, посебно осврнувајќи се на жителите на Абхазија и регионот Цхинвали, територии надвор од контролата на грузиските власти.
„Нашите мисли и молитви денес се особено со луѓето што живеат во Абхазија и регионот Цхинвали. Овие древни историски грузиски земји треба да продолжат да живеат во мир со својата татковина преку верата во Христа и љубовта“, порача Шио III.
Тој изрази надеж дека со Божја помош повторно ќе бидат обновени братското единство и љубовта. Патријархот се осврна и на Грузијците што живеат во странство, истакнувајќи дека ја зачувуваат верата и врските со Црквата и татковината.
Осврнувајќи се на историското наследство на Грузија, Шио III ги повика верниците да останат цврсти во православната вера и покрај современите предизвици. Тој ги потсети на зборовите што се пренесуваат низ генерациите: „Нема да Те предадеме, ниту ќе Те напуштиме, наша гордост, Православие“.
Црквата како столб на грузиската државност
Премиерот Иракли Кобахидзе истакна дека христијанството има пресудно значење за историскиот развој на Грузија и за обликувањето на нејзиниот национален идентитет. Според него, прогласувањето на христијанството за државна религија пред 1.700 години било историска одлука со долгорочни последици за земјата.
Кобахидзе нагласи дека Грузиската православна црква низ вековите имала важна улога во зачувувањето на националното единство и христијанските вредности. Тој посебно го истакна придонесот на покојниот патријарх Илија II за зајакнувањето на односите меѓу Црквата и современата грузиска држава.
„Државата има посебна почит кон овие вечни вредности. Преку тесна соработка со Црквата, цврсто ќе го чуваме наследството врз кое се темелат нашето национално единство и развој“, изјави грузискиот премиер.
Претседателот Михаил Кавелашвили го опиша прифаќањето на христијанството како пресвртница во историјата на Грузија, нагласувајќи дека Црквата имала значајна улога во зачувувањето на јазикот, традициите и историското паметење во периодите на странски инвазии и политички превирања.
Тој ги издвоил седумте вредности што, според него, се темел на грузиската државност: Бог, татковина, човек, родна земја, јазик, вера и семејство.
Осврнувајќи се на глобализацијата и технолошкиот развој, вклучително и вештачката интелигенција, Кавелашвили предупреди дека зачувувањето на овие вредности е важно за заштитата на човечкиот идентитет и за зајакнувањето на општеството.
„Ова наследство, создавано низ бурите на вековите, е најважната гаранција за силна, обединета и суверена Грузија“, порача претседателот.
