Свештенството и верниците на Австралиско-сиднејската епархија на МПЦ–ОА му упатија честитки на архиепископот охридски и македонски г. г. Стефан по повод 40 години од неговата архиерејска хиротонија. Архиепископот Стефан, покрај тоа што е поглавар на МПЦ–ОА, воедно е и надлежен архиереј на оваа епархија.
Честитката е упатена од Епархискиот управен одбор, во името на свештенството и верниот народ, со благодарност за четирите децении архиерејско служење и молитви за добро здравје, духовна крепост и мудрост во неговата архипастирска служба.
„Четири децении архиерејско служење претставуваат сведоштво за живот посветен во служба на Христа и Неговата Света Црква“, се наведува во честитката, во која се изразуваат молитви Господ да го укрепува архиепископот Стефан во неговото понатамошно служење.
Јубилејот од 40 години од неговата архиерејска хиротонија се одбележува во 2026 година.
Во завршницата на честитката, свештенството и верниците на Австралиско-сиднејската епархија му посакуваат на архиепископот Стефан уште многу години во служба на Црквата, со традиционалниот поздрав: „На многаја лета, Ваше Блаженство!“
