Со свечено црковно пеење на хорот „Свети Наум Охридски“ од Софија, Делчево го одбележа празникот Успение на Пресвета Богородица. Хорот од Бугарија, под раководство на протопсалтот Андреј Касабов, учествуваше во празничната Света Божествена Литургија во храмот во Делчево, давајќи посебна свеченост на богослужбата.
Празничната богослужба на 28 август ја предводеше Епископот Делчевско-каменички г. Марко, во сослужение со свештенството. Храмот беше исполнет со верници кои дојдоа да го одбележат големиот празник посветен на Успението на Пресвета Богородица.
Посебен белег на годинашното празнување беше гостувањето на хорот „Свети Наум Охридски“ од Софија. Со своето учество и изведбата на црковните песнопенија, хористите придонесоа богослужбата да има уште посилна празнична атмосфера.
Хорот настапи под раководство на протопсалтот Андреј Касабов, а неговото гостување во Делчево претставуваше и своеобразна потврда на блиските духовни и црковно-културни врски меѓу верниците од двете страни на границата.
Празнувањето започна уште вечерта на 27 август, кога Епископот г. Марко чиноначалствуваше со вечерната богослужба во храмовите во Делчево и Македонска Каменица, во предвечерието на празникот.
По Литургијата во Делчево, Епископот Марко им се обрати на присутните со празнична беседа посветена на значењето на Успението на Пресвета Богородица.
Празникот беше одбележан со Свети Божествени Литургии и во останатите храмови во Делчевско-каменичката епархија посветени на Успението на Пресвета Богородица.
