Со свечена богослужба во Крушево денеска беше одбележан празникот на Светите Седмочисленици и споменот на Светиот великомаченик и исцелител Пантелејмон.
Празничните богослужби се одржаа во соборниот храм „Свети Николај Мирликијски“ во Крушево. На утрената богослужба началствуваше викарниот епископ Дремвитски Давид.
На Светата Божествена Литургија началствуваше митрополитот Крушевско-демирхисарски Јован, во сослужение со епископот Давид и свештенослужители од Крушевско-демирхисарската митрополија.
По читањето на евангелскиот текст, епископот Давид се обрати со празнична беседа, говорејќи за значењето на празникот и сведоштвото на Светите Седмочисленици и Светиот великомаченик Пантелејмон.
На крајот од Литургијата, свое обраќање имаше и митрополитот Јован, по што двајцата архијереи разменија благодарствени изрази.
Празничното чествување во Крушево беше проследено со молитвено присуство на верници, кои заеднички ги прославија Светите Седмочисленици и Свети Пантелејмон.
