Една од најважните одлуки што би можеле да бидат донесени на претстојниот Свет архиерејски собор на Српската православна црква, е судбината на митрополитот жички Јустин. Според информации од црковни кругови, се очекува архиереите да ја разгледуваат можноста за негово расчинување, односно конечно отстранување од епископскиот трон, по повеќемесечна постапка која предизвика длабоки поделби меѓу верниците и свештенството.
Според информациите до кои дошол порталот Нова.рс, на епископот Јустин максимално му била отежната одбраната, па така во пресрет на Соборот добил обемна документација на која морал да одговори во рок пократок од две недели.
Документацијата што му била доставена на Јустин, како што дознава Нова, брои неколку стотици страници, а нему му било забрането комуницирање и консултации со адвокат или соработници.
Во претходна изјава за порталот Нова.рс, академикот Радомир Саичиќ изјавил дека митрополитот Јустин не станал мета случајно и потсетил дека токму тој, според неговото мислење, бил единствениот епископ во Србија кој отворено ги поддржал студентите и јавно им се спротивставил на тврдењата дека студентското движење е дел од „обоена револуција“.
„Единствениот епископ од Србија кој јасно и недвосмислено застана покрај студентите беше митрополитот жички Јустин. Тоа, според мое мислење, воопшто не е случајно. Можеби постои и длабока симболика во тоа што токму жичкиот епископ стана мета на прогон. Свети Сава својата позната Беседа за вистинската вера ја одржал токму во Жича во 1221 година, на соборот кој ги поставил темелите на духовниот и државниот идентитет на српскиот народ. Затоа можеби не е нелогично токму епископот кој седи на тој трон да покаже најмногу достоинство и да биде подготвен да ги сноси последиците поради својот став“, вели Саичиќ.
Според неговото мислење, сето тоа укажува дека исходот од постапката однапред е одреден.
„Се плашам дека на митрополитот Јустин му се подготвува расчинување и симнување на крајно неправеден начин. Ако тоа навистина се случи, тоа ќе биде една од најтешките одлуки во современата историја на Српската православна црква“, објаснил академикот.
Застанал покрај студентите
Митрополитот Јустин, во чија епархија припаѓа и манастирот Студеница, веќе долго време им дава поддршка на студентите и упатува критики кон власта во Србија, која ја предупредил дека „моќта не е дадена за насилство, туку за служење“.
СПЦ против него, како што претходно пишуваше „Нова“, покренала истрага поради „спорниот начин на кој досега управувал со Жичката епархија“. Имено, крајната идеја е на Јустин да му биде упатено барање да се пензионира.
За таа цел, Синодот на Српската православна црква формирал комисија составена од митрополитот бачки Иринеј Буловиќ, епископот будимљанско-никшиќки Методиј и протојереј-ставрофор Велибор Џомиќ, која донела одлука за суспензија на Јустин.
Дека станува збор за прашање кое ги надминува внатрецрковните рамки покажува и еден извештај од терен и текст објавен на сајтот Озонпрес. Имено, во Бресница кај Горњи Милановац биле одбележани 200 години од Храмот на Покровот на Пресвета Богородица.
Храмот го посетил и света литургија служел архиепископот и митрополит жички Јустин, кого го пречекал голем број верници, но и четворица припадници на БИА кои го следеле собирот од почеток, неговата беседа, а потоа и неформалните разговори на трпезата на љубовта во парохискиот дом.
