Грузискиот премиер Иракли Кобахидзе, претседателот на Парламентот Шалва Папуашвили, претседателот на државата Михаил Кавелашвили, градоначалникот на Тбилиси Каха Каладзе, претставници на извршната и законодавната власт, беа дел од оние кои присуствуваа на востоличувањето на Грузискиот патријарх Шио III, само ден по неговиот избор.
Шио, роден беше избран за 142. патријарх на Грузија на историскиот Проширен собор, одржан во катедралниот храм „Света Троица“ во Тбилиси. Во говорот по изборот ја повика Црквата да ги споделува и радостите и страдањата на народот и духовно да остане блиска до општеството.
„Силата на Црквата не е само во зборовите“, рече патријархот Шио III. „Нејзиниот повик се наоѓа во христоподобната љубов и во носењето на товарите едни на други.“
Новоизбраниот патријарх нагласи дека вратите на Црквата мора да останат отворени за сите и дека свештенството треба активно да им пристапува на оние кои можеби се чувствуваат оддалечени од црковниот живот.
„Мора широко да ги отвориме вратите на Црквата за сите. Не треба само да чекаме ближниот да дојде до црковниот амвон“, истакна тој. „Надвор од црковните ѕидови, со љубов треба да ги прегрнеме нашите духовни чеда, кои, како блудниот син, можеби не се осмелуваат да дојдат кај нас.“
Патријархот Шио III предупреди дека современиот живот носи сѐ посериозни духовни предизвици, додавајќи дека „човечките срца станале отуѓени и студени“, додека искушенијата често ги заменуваат „верата, моралните вредности, семејството и ближните.“
Грузискиот поглавар ја нагласи и важноста на младите и образованието, истакнувајќи дека иднината на нацијата зависи од зајакнувањето на христијанската вера, националните вредности, почитта кон традицијата и одговорноста кон Црквата и општеството. Тој дополнително подвлече дека образованието и јавниот живот треба да се темелат не само на знаење, туку и на „христоподобна љубов и духовни вредности.“
„Се молам, како добар пастир, да можам да го положам својот живот за своето стадо и смирено да го носам тешкиот крст на Патријаршијата“, рече тој.
