Митрополитот на Морфу, Неофит, познат по своите конспиративни говори, упати сериозно предупредување за 2026 година, оценувајќи ја како една од најкритичните пресвртници во историјата на човештвото. Во свои јавни излагања, тој говори за духовната димензија на актуелните глобални случувања, во време кога, како што посочува, геополитичката сцена е исполнета со тензии и подготовка за вооружени конфликти.
Според митрополитот, човештвото влегло во исклучително опасен период. Тој наведува дека постојат духовни толкувања и пророштва кои ја поврзуваат 2026 година со можноста за големо светско разгорување, па дури и со глобален воен судир. Во тој контекст, тој предупредува на опасноста од употреба на нуклеарно оружје и на последиците што би ги имало тоа врз атмосферата, природата и целиот човечки род.
Митрополитот Морфу истакнува дека овие искушенија, според црковното разбирање, се допуштаат поради духовната состојба на светот, поради отсуството на покајание и оддалечувањето од Божјите заповеди. Како што вели, кога човештвото не се коригира преку мир и разум, тогаш следуваат тешки и болни искуства, кои имаат за цел духовно будење.
Во вакви околности, митрополитот нагласува дека стравот може да се надмине единствено преку духовен живот. Тој ја посочува Светата Литургија како централно средство за духовна заштита и обновување, нагласувајќи дека таа го осветува човекот и телесно и духовно. Воедно, упатува критика кон современата зависност од технологијата, интернетот и мобилните уреди, повикувајќи ги верниците да најдат време за лична молитва и покајание.
