Православната епископска конференција на Бенелукс ја одржа својата 31. седница во седиштето на Православната архиепископија на Белгија, во Брисел, под претседателство на митрополитот Атинагора од Белгија (Вселенска патријаршија). На средбата, одржана на 4 ноември, присуствуваа претставници на повеќе помесни православни цркви – меѓу нив и епископи од Српската и Руската православна црква – но не и претставник на Македонската православна црква – Охридска архиепископија.
Отсуството на МПЦ-ОА на оваа средба, и покрај тоа што Српската и Руската православна црква веќе официјално ја признаа нејзината автокефалност, укажува дека македонската црква сè уште не е третирана како рамноправна автокефална членка во рамките на меѓуправославните структури.
На конференцијата, која ги обединува православните епископи од Белгија, Холандија и Луксембург, присуствуваа митрополитот Серафим од Романската патријаршија, епископите Јустин (Српска патријаршија), Симеон (Московска патријаршија), Доситеј (Грузиска патријаршија), Јоаким од Аполонија и Марко од Неамц.
Епископите разговараа за признавањето на православните парохии од страна на белгиската држава, развојот на соработката со властите, како и за капеланската служба во војската и затворите во Белгија и Холандија. Тема на разговор беа и младинските активности, можноста за воведување на православна веронаука во холандските училишта, како и претстојното поклоничко патување на православните верници од Бенелукс во Романија во септември 2026 година.
Следниот состанок на Православната епископска конференција на Бенелукс е закажан за 29 јануари 2026 година, заедно со католичките епископи, а потоа и за 18 јуни 2026 година.
Православната епископска конференција на Бенелукс е формирана во 2009 година по одлука на Четвртата Панправославна предсоборна конференција во Шамбези, како дел од поширокиот систем на регионални православни собири под покровителство на Вселенската патријаршија.
