Монасите од Бигорската Обител, заедно со Архимандритот Партениј за денот на сесловенските просветители, Светите Кирил и Методиј, за прв пат отслужија литургија во Бигорскиот скит „Свети Кирил и Методиј“ во селото Битуше.
-Совпаѓањето на одданието на празникот Пасха и споменот на Светите Браќа има длабока смисла. Имено, воскресенската благодат, чиишто први сведоци биле светите Апостоли, кои со свои очи Го видоа Воскреснатиот и Воскресителот и со проповедта за Него ја уловиле вселената, ги раководела и Рамноапостолите, тие големи синови на Воскресението, за великото дело на проповед на Благовестието среде Славјаните и други народи. Верата и надежта за Воскресението, кои некогаш ги вдахновувале составителите на библиските книги и богослужбените песни и молитвословија, им содејствувале и на богомудрите просветители во преводот на Светото Писмо и литургиските текстови на јазикот на нашите предци“ – исполнет со благодарност и душевен восторг, ќе рече нашиот светителољубив Старец, Архимандрит Партениј, во разговор со своите собраќа и сестри во подвигот за Христа, велат од Бигорски.
Овој Бигорски скит се гради во рамки на објектот за кампот по веронаука, што секога година го организира Бигорскиот манастир.
