Од 30 јануари до 3 февруари, во Кремиковскиот манастир кај Софија се одржа одбележувањето на Светскиот ден на православната младина за 2026 година. Настанот беше заеднички организиран од Супрасл – светско здружение на православна младина, Бугарската православна младинска заедница и романската пролаиф организација АСКОР Јаши, со благослов на бугарскиот патријарх Даниил.
На меѓународната средба учествуваа повеќе од 60 млади луѓе од различни земји, меѓу кои и од Израел и Соединетите Американски Држави.
Учесниците беа пречекани во манастирот со програма насочена кон молитва, разговори и заеднички активности. Во воведните сесии беше истакната мисијата на Супрасл за зајакнување на единството меѓу православната младина над националните и културните граници.
Првиот целосен ден беше посветен на мисијата на Црквата во современото општество. Игуменот на манастирот, јеромонах Серафим, ја претстави социјалната и пастирската дејност на Кремиковскиот манастир, вклучувајќи служби за лица со попреченост и деца со ментални предизвици. Сведоштва и размислувања споделија и свештеникот Павле Динков и неговата сопруга Лорис, говорејќи за сведочењето на верата преку секојдневните средби.
Со вечерната богослужба беше одбележана 130-годишнината од раѓањето на свети Софрониј Атонски од Есекс, при што Исусовата молитва беше читана на седум јазици. Вечерта заврши со културна програма со традиционална храна, музика и ора од земјите на учесниците.
Во недела беше отслужена света Bожествена литургија со богослужбени одговори на повеќе јазици. По заедничката агапе-трпеза, свештеникот Никодим од АСКОР Јаши одржа разговор на тема личен духовен раст, по што следеше креативна работилница. Истата вечер беше отслужена и голема вечерна за празникот Сретение Господово, заедно со разговори во мали групи за верата и призванието.
Последниот ден се совпадна со празникот Сретение Господово и со Светскиот ден на православната младина. Епископот Мелетиј на Знепол началствуваше со празничната литургија, а подоцна одржа и излагање на тема заедница и осаменост во христијанскиот живот, инспирирано од делата на свети Софрониј. Учесниците го посетија и центарот на Софија, како и детскиот центар за социјална рехабилитација што го води манастирот.
