Светиот синод на Руската православна црква, со кој претседавал патријархот Кирил, на седницата одржана на 22 октомври во Москва одобрил посебен документ со упатства за прием на лица од украински црковни структури што Московската патријаршија ги смета за расколнички.
Документот, насловен „Упатства за прием на лица од украинските расколнички структури кои сакаат да ѝ се приклучат на Руската православна црква“, бил подготвен од Синодалниот мисионерски оддел на Руската црква.
Според соопштението на Московската патријаршија, потребата од вакви упатства ја посочиле мисионерските оддели на епархиите во Донбас и на териториите што руската страна ги нарекува „Новоросија“. Тие побарале практични насоки за постапување со лица од украински верски заедници кои сакаат да преминат под јурисдикција на Руската православна црква.
Пред усвојувањето, нацрт-документот бил разгледан и од Одделот за надворешни црковни врски на Московската патријаршија, кој внел измени и дополнувања.
Седницата се одржала во Патријаршиската и синодална резиденција во московскиот манастир „Свети Данило“, а на неа биле разгледани и други прашања поврзани со црковниот живот и активностите на Руската православна црква.
Светиот синод разгледал и прашања поврзани со почитувањето на моштите на свети Димитриј Донски.
Според информациите презентирани на седницата, на 6 септември делови од моштите биле пренесени во московскиот храм „Христос Спасител“ и во Патријаршиската катедрала „Воскресение Христово“, која служи како главен храм на руските вооружени сили.
Потоа, дел од моштите бил однесен во Донбас и на териториите што руските власти ги нарекуваат „Новоросија“, каде што му се поклонувале руски војници кои учествуваат во војната во Украина. Москва војната ја нарекува „специјална воена операција“.
По завршувањето на пренесувањето и поклонението, моштите биле вратени во главниот храм на руските вооружени сили.
