Романската православна црква повторно ја претстави Македонската православна црква – Охридска архиепископија како „Православна црква на Северна Македонија“, овојпат во официјалниот извештај за учеството на епископот Јаков Стобиски на црковната прослава во романскиот град Јаши.
Во извештајот објавен на официјалниот црковен портал Basilica.ro, епископот Јаков е наведен како викарен епископ Стобиски на Струмичката митрополија, при што неговата црковна припадност е означена како „Православната црква на Северна Македонија“.
Ова именување не е ново во односите меѓу двете цркви. Уште во февруари 2023 година, кога Светиот синод на Романската православна црква го призна томосот за автокефалност што Српската православна црква го издаде на 5 јуни 2022 година, романската страна во своето официјално соопштение ја користеше формулацијата „Православната црква во Република Северна Македонија“.
Во истото соопштение, Романската црква појасни дека го признава томосот издаден од СПЦ, но истовремено очекува Вселенската патријаршија да започне консултации и да издаде конечен томос за автокефалност, со кој би се изразил сеправославен консензус за ова прашање.
Истовремено, ставот на Романската православна црква од 2023 година покажува дека признавањето на српскиот томос не го сметала за завршување на прашањето за автокефалноста. Таа очекуваше конечен томос од Вселенската патријаршија, во рамки на поширок сеправославен консензус.
