Папата Франциск и Вселенскиот патријарх Вартоломеј ќе бидат гости на грчкиот Архиепископ Јероним, следната недела. Средбата на тројцата поглавари ќе се случи на островот Лезбос, а поводот е бегалската криза.
Синодот на Грчката православна црква денеска позитивно одговорил на барањето на Ватикан за посета на Грција и островот Лезбос, каде заедно со Вселенскиот патријарх Вартоломеј и грчкиот Архиепископ, во кампот за беглаци, ќе им оддадат почит на жртвите кои загинаа во Егејското море на патот кон Западна Европа.
На Лезбос, покрај од Јероним, Франциск ќе биде придружуван и од грчкиот премиер, Алексис Ципрас.
Целта на посетата на Франциск на Грција, како што соопштува Грчката Архиепископија, е придонесот на Папата во свеста на меѓународната заедница за итен прекин на непријателствата во поширокиот Медитерански регион и Блискиот Исток, а со тоа и да се реши хуманитарниот проблем предизвикан од очајните бегалци кои бараат подобра иднина во Европа.
Синод на Грчката Црква тврди дека го прифатил предлогот за посета на папата Франциск бидејќи станува збор за јасно хуманитарна и симболична посета.
Атинската архиепископија, соопштува дека идејата на оваа средба да биде присутен и Цариградскиот патријарх Вартоломеј била нејзина, со цел да се демонстрира единството на Православната црква.
-Личноста и авторитетот на Вселенскиот патријарх, заедно со тежината на присуството на Папата Франциск, испраќа многу силен сигнал до целиот свет како почеток на светската заедница кон ублажување на проблемите на бегалците и истовремено и пораки за соодветни мерки за заштита на христијаните кои страдаат сурово во поширокиот регион на Блискиот Исток, стои во соопштението на Синодот на ГПЦ.
