Во иранската престолнина Техеран беше отворена нова метро-станица наречена „Света Богородица“ (Maryam-e-Moqaddas), која се наоѓа во близина на ерменско-григоријанската катедрала „Свети Саркис“ — главниот храм на ерменската заедница во градот.
Иако шиитскиот ислам е официјална религија во Иран, новата станица изненадува со својата уметничка и духовна симболика: нејзиниот куполест ентериер е украсен со фрески и дела посветени на Дева Марија, мајката на Христос, која е почитувана и во исламската традиција.
На ѕидовите на станицата, Марија е прикажана во молитва со бел гулаб – симбол на Светиот Дух – што лебди над нејзината глава, а на соседниот перон е прикажан Христос како штити и благословува патници. Уметничката Тина Тарик Мер, која стои зад делата, објаснува дека идејата била „секоја личност што ќе помине низ станицата да почувствува почит кон сите религии, особено кон христијанството“.
„Оваа птица е симбол на Светиот Дух, а маслиновото дрво е симбол на мирот и пријателството“, рече уметничката на презентацијата за медиумите.
Градоначалникот на Техеран, Алиреза Закани, изјави дека станицата е „потсетник на божествената жена која го разбуди светот со својата чистота“ и нагласи дека архитектурата има цел „да ја покаже можноста за заедничко постоење на религиите во Техеран“.
Иранската јавност и социјалните мрежи позитивно ја пречекаа иницијативата, нарекувајќи ја пример за културен дијалог и меѓурелигиско почитување. Многумина ја оценија како симболичен гест на толеранција во мултиетничка и мултирелигиска држава, каде што христијанството, јудаизмот и зороастризмот се официјално признати покрај исламот.
Според иранските медиуми, името на станицата не предизвикува контроверзии бидејќи Марија (Маријам) е длабоко почитувана и во шиитската традиција како симбол на вера, мајчинство и чистота.
