Импичментот на поранешниот претседател Јун Сук Јол ја разоткри длабоката поделба во јужнокорејското општество. Една од тие линии на расцеп поминува низ бројната христијанска заедница во земјата. Евангелистите се појавија како едни од најсилните поддржувачи на г. Јун по неговиот неуспешен обид за воведување на воена состојба. Џон Кван-хун, крајнодесничарски пастор, организираше митинзи во негова чест под слоганот „Спасете ја Кореја“. Наспроти тоа, Националниот совет на црквите во Кореја – поумерено екуменско тело – ја поздрави „историската одлука“ на уставниот суд за враќање на демократијата.
Христијанството одамна е моќна сила во јужнокорејското општество, особено во борбите околу демократијата. Јужна Кореја е една од најхристијанските земји во Азија, со околу 30% од населението што се идентификува како христијани. Протестантските групи обично се поистоветуваа со поствоените авторитарни режими, додека римокатолиците ја поддржуваа демократизацијата во 1980-тите. Денес поделбите се помалку јасно дефинирани, но не помалку изразени. „Ние христијаните сме своја оска во спектарот на едно поларизирано општество; не се вклопуваме лесно во познатите рамки“, вели Чо Сеунг-хјон од Католичката радиодифузна корпорација за мир.
На многу начини, малцинскиот статус на христијанството не го одразува неговото вистинско влијание во земјата – како и во добар дел од Азија. Само Филипините и Источен Тимор се земји со христијанско мнозинство. Но, додека христијанското население опаѓа во Европа и Северна Америка, „тежиштето на христијанството се преместува“, тврди Матиус Џорџ Чунакара од Христијанската конференција на Азија, регионално екуменско тело. Африка и Латинска Америка се главните извори на нови верници, но и Азија игра сè поважна улога. Христијанското население таму бележи просечен раст од 1,6% годишно во периодот 2020–2025. Минатиот ноември, како знак за растечкото значење на регионот за христијанството, папата Франциск ја посети Југоисточна Азија.
Христијански лидери сè почесто доаѓаат од Азија, забележува Тод Џонсон од Богословскиот семинариум „Гордон-Конвел“ во Бостон. Движењето Лозана, евангелистичка организација основана од американскиот пастир Били Грахам, е предводено од Корео-американец кој работи интензивно во Јапонија. Последните претседатели на Пентекосталното светско заедништво и Светската евангелистичка алијанса – две големи евангелистички движења – биле, соодветно, Малезиец и Филипинец. Јужнокорејските мисионери се меѓу најактивните во светот. А јужнокорејскиот кардинал Лазар Ју Хеунг-Сик се споменува како можен иден папа.
Можно е бројот на христијани во Азија да е поголем отколку што обично се смета.
Фенгганг Јанг од Универзитетот Пердју во Индијана тврди дека многу анкети го потценуваат уделот на христијаните во азиските земји, бидејќи ги принудуваат испитаниците да изберат една религија, додека духовните практики во регионот често се хибридни. Земете ја за пример Јапонија, каде што христијанството било насилно потиснувано сè до отворањето на земјата во доцниот 19. век. Се смета дека само 1% од населението во Јапонија се христијани, но ако на испитаниците им се дозволи да наведат повеќе верски припадности, бројот на оние што се идентификуваат и со христијанството може да порасне на 3–4%, вели Јанг.
Христијанството има непропорционално силно влијание во образованието, а преку тоа и меѓу елитите во регионот. Девет од 65-те јапонски премиери по Втората светска војна (околу 14%) биле христијани — меѓу нив и актуелниот премиер Ишиба Шигеру. „Ако сакате да најдете заедничка нишка во оваа појава, тоа е образованието“, вели Леви Меклафлин од Државниот универзитет во Северна Каролина. Многу од водечките приватни училишта во Јапонија имаат христијански корени. Од околу 600 приватни универзитети во земјата, околу 10% се христијански, проценува Јоичи Јамагучи, претседател на Христијанскиот универзитет во Токио.
Непропорционалното влијание на христијанството е особено изразено во Јужна Кореја.
Околу 70% од јужнокорејските претседатели по војната биле христијани, додека приближно една третина од универзитетите во земјата се христијански, вели Ким Еун-ги од Универзитетот Кореа.
Современата христијанска заедница во Јужна Кореја е извонредно разновидна. „Постои цел спектар од крајна десница до крајна левица не само во корејското општество туку и во самите корејски цркви“, вели г. Ким. Понекогаш христијаните се усогласуваат со прогресивците во однос на економски прашања, како што се правата на работниците, но заземаат конзервативна позиција кога станува збор за општествени теми.
Јужнокорејските евангелистички цркви често се предводници во отпорот кон правата на ЛГБТ-заедницата во земјата. Таквите мегацркви имаат силни врски со американските. Минатото лето, Доналд Трамп Јуниор, синот на американскиот претседател, говореше во црквата „Yoido Full Gospel Church“ – најголемата мегацрква во светот, во Сеул. „Ќе продолжиме да се бориме за сите јудео-христијански вредности во кои веруваме и кои ги споделувате со нас“, изјави тој. Овие цркви можат да извршат „огромно влијание“ врз јужнокорејската политика преку мобилизирање на големи групи потенцијални гласачи, вели Ли Донг-хван, пастор кој бил екскомунициран од Методистичката црква на Јужна Кореја поради поддршката за правата на ЛГБТ-лицата.
/ЕКОМОМИСТ
