Поглаварите на црквите и верските заедници бараат крај на тензиите и решение на кризата

Петте уставни верски заедници повикуваат на смирување на состојбите и воздржување од дејствија кои можат да ја загрозат државата, но и безбедноста на сите, пренесува „Религија.мк“

Во апелот потпишан од поглаварите на МПЦ, Архиепископот г.г. Стефан, на ИВЗ, ха.Сулејман еф. Реџепи, на Католичката црква, Бикупот и апостолски егзарх, Киро Стојанов, на Евангелско-методистичката црква, проповедник Михаил Цеков, како и на Еврејската заедница, Берта Романо Николиќ, стои дека оваа прилика е историска можност да се покаже дека навистина се сакаме заедничка Татковина – Република Македонија, без разлика на која национална и верска заедница се припаѓа.

-Треба да сфатиме дека вистинско заедничко живеење се постигнува единствено во мир, со почитување на различностите и на правата на секој поединец, без скратување и нарушување на правата и достоинството на другите. Затоа, како Цркви и верски заедници, апелираме за смирување на состојбите, за покажување на добра волја и разумност во одлуките и постапките; повикуваме на воздржување од дејства што можат да ја  загрозат државната, но и безбедноста на луѓето, на домовите, на семејствата и на сите нас, воопшто. Апелираме до политичарите и партиите да го покажат своето човекољубие и родољубие и во духот на почитувањето и толеранцијата да преземат заеднички и неодложни мерки, засновани врз легитимни државни и законски прописи, во надминувањето на искушенијата и опасностите што демнат, стои во апелот на црквите и верските заедници во Македонија.

-Само така, сплотени и единствени, достојно ќе покажеме пред целиот свет дека мултиетничкото и мултирелигиозното општество во кое живееме може да функционира и опстојува. Сето тоа веќе се потврдило во нашата заедничка историја. Затоа, и ние како генерација, да покажеме преку личниот пример и со своите дела, а за доброто на нашата Татковина, дека сме доследни и достојни  наследници на нашите претходни генерации, дека сме вистински верници и патриоти. Впрочем, единствено така ќе покажеме дека сме достојни и на родот и на верата на кои им припаѓаме!, порачуваат поглаварите на црквите и верските заедници во Македонија.