Саудиска Арабија погубила маж и жена од Бангладеш, осудени за она што властите го опишале како „неморален чин“ во џамија во светиот град Мека. Властите во Бангладеш не биле претходно известени за извршувањето на смртните казни, а по случајот побарале официјално објаснување од саудиската влада, објавија Би-Би-Си и бангладешкиот весник „Дејли стар“.
Погубувањата биле извршени на 14 октомври 2026 година. Саудиското Министерство за внатрешни работи соопштило дека двајцата биле осудени на смрт според правниот принцип „тазир“, кој овозможува судијата да ја определи казната, наведувајќи ја тежината на делото и нарушувањето на светоста на џамијата. Според соопштението, пресудите биле потврдени од надлежните судски власти, а потоа била издадена наредба за нивно извршување.
Саудиските власти не прецизирале за каков чин станувало збор. На социјалните мрежи се појавија тврдења дека станувало збор за бакнување, но тие не се потврдени со официјалните информации за случајот.
Министерството за надворешни работи на Бангладеш соопштило дека побарало детали за обвиненијата и судската постапка. На 18 октомври претставници на министерството побарале објаснување и од саудискиот амбасадор во Дака. Бангладешките власти наведуваат дека за погубувањата дознале откако тие веќе биле извршени.
Според „Дејли стар“, имињата на двајцата се наоѓале на список со затвореници што Саудиска Арабија претходно му го доставила на бангладешкиот конзулат во Џеда, но во документот не било наведено дека биле осудени на смрт. Извештаите на бангладешките медиуми посочуваат дека двајцата биле во притвор од август 2023 година, во врска со одделни обвиненија.
Државната министерка за надворешни работи на Бангладеш, Шама Обаед Ислам, изјавила дека владата ќе ги разгледа следните чекори откако ќе ги добие одговорите од саудиските власти. Меѓу прашањата е и можноста посмртните останки на погубените да бидат вратени во татковината. Таа нагласила дека владата е посветена на заштитата на интересите на своите државјани во странство.
Случајот предизвика загриженост во Бангладеш, чии државјани сочинуваат значителен дел од странската работна сила во Саудиска Арабија. Повеќе од три милиони Бангладешани живеат и работат во кралството, според податоците наведени во медиумските извештаи.
Погубувањата на странски државјани се дел од пошироката практика на Саудиска Арабија. „Амнести интернешнл“ регистрирала 96 погубувања во земјата во периодот од 1 јануари до 22 јуни 2026 година, од кои 61 биле за кривични дела поврзани со дрога. Организацијата предупредува дека странските државјани се несразмерно застапени меѓу лицата погубени за такви дела.
