Дамаскин Дорниски, викарен Епископ на Архиепископијата на Сучава и Радауци, од православна Црква на Романија бил во посета на Бигорскиот манастир. За време на неколкудневната посета на МПЦ-ОА, романскиот владика служел со Епископ Антаниски Партениј во Бигорски, а меѓу свештенослужителите бил и свештеник на СПЦ. Тој занедно со десетици верници од Србија бил на поклониќко патување во Бигорски.
-Посакувајќи му од името на сите нас срдечно добредојде и пријатен престој во Обителта, Старецот, помеѓу другото, кажа дека иако за прв пат се среќава и го запознава својот гостин во живо, токму поради заедничката љубов кон Христа и кон монаштвото, како и поради мистичното единство во Божествената Евхаристија, го чувствува за мошне познат и близок, како вистински брат во Господа. Епископот г. Дамаскин, од своја страна благодарствено возврати дека тоа чувство на духовно познанство и единство во Христа е обострано, дотолку повеќе што тој и неговиот архиѓакон редовно ги следеле видео-содржините од нашата Обител и особено биле воодушевени од документарниот филм „1000 години – Сведок на Светлината“. Всушност, откако го изгледале ова јубилејно филмско остварување, тие конечно се решиле да дојдат и да ја посетат бигорската скинија на Чесниот Претеча. Владиката од Романија ја истакна и својата нескриена радост што со одлуката на Вселенската Патријаршија од месец мај минатата година, нашата Црква се наоѓа во литургиско и канонско единство со сите останати помесни православни Цркви, велат од Бигорски.
