Верски календар: 08.Јануари
МПЦ-ОА/ Собор на пресвета Богородица – Втор ден Божик
На вториот ден од Божик христијанската Црква ѝ оддава слава на Пресветата Божја Мајка, Којашто Го роди Господ и Сапсителот наш Исус Христос. Ова празнување се нарекува Нејзин собор затоа што на тој ден се собираат сите верни за да Ја прослават Нејзе, Која е Богородица. Тогаш се служи торжествено, соборно, во Нејзина чест. Во Охрид од древноста беше устроено спроти вториот ден на Божик вечерната да се служи само во црквата на Пресвета Богородица, наречена Челница. Целото свештенство со народот овде соборно Ја прославуваше Пречистата Божја Мајка.
КАТОЛИЧКА ЦРКВА/ Св. Ерхард
Живеел во времето после преселбите на народите, кога покрстувањето на европските народи било од одлучувачка важност. Како мисионер во Шкотска живеел црквен и редовнички живот. Како бискуп, желбата за Христос да освои што повеќе души, го натерала на мисионерски патувања. Умрел во Регенсбург, во 720 година.
