Месопуна недела. Недела во која што го отпуштаме месото од нашата исхрана. Секако не е задолжително , но е препорачливо како момент преку кој би се прилагодиле на телесниот велигденски строг пост наредната недела во која што започнува истиот.
И уште нешто на што нè учи денешното евангелие. Господ Бог нема да нè праша на последниот Негов суд дали сме знаеле теологија, туку дали теологијата сме ја спроведувале во нашите животи. Или со прости зборови ќе нè праша дали сме го нахраниле, сме го облекле, сме го посетиле нашиот ближен во затвор или кога бил болен или сме го игнорирале. А сме имале можност сето тоа да му го направиме на Христа преку најмалиот наш брат.
Сигурно нема да нè праша дали сме биле за изградба на крст или не, дали сме протестирале, дали сме реагирале кога се поставил орелот.
Нека се запише сè ова на моја душа ако не е така како што ве учам јас согласно Евангелието.
А вие постапете според Евангелие и ваша совест.
Митрополит Европски – Пимен
